JNUSU President Kanhaiya Kumar’s speech before being arrested

See also in The Citizen Why Is The Media Not Reporting Kanhaiya’s Speech?

For English translation of Kanhaiya’s speech, see:

If anti-national means this, God save our country

JNUSU President Kanhaiya Kumar’s Speech: Full Transcript

(Devanagari transcript is forthcoming)

Hum hain is desh ke. Aur is mitti se pyar karte hain. Is desh ke andar jo assi pratishad garib aavam hai, hum uske liye ladte hain. Hamare liye yahi desh-hit hai. Humein pura bharosa hai Baba Saheb ke upar. Humein pura bharosa hai apne desh ke samvidhan ke upar. aur hum is baat ko pure mazbooti se kehna chahte hain ke is desh ki samvidhan pe koi ungli uthayega chahe voh ungli sanghiyon ka ho, chahe voh ungli kisi ka bhi ho us ungli ko hum bardasht nahin karenge. Hum samvidhan mein bharosa karte hain. Lekin jo samvidhan Nagpur aur jhandewalan mein padhaya jaata hai us samvidhan pe humko koi bharosa Nahin. Humko manusmriti pe koi bharosa nahin hai. Humko is desh ke andar jo jaativad hai us pe koi bharosa nahin hai. Aur vahi samvidhan, vahi Baba Saheb Doctor Bhimrao Ambedkar, samvidhan mein samvidhanik upchar ki baat karte hain. Vahi Baba Saheb Dr Bhimrao Ambedkar capital punishment ko abolish karne ki baat karte hain. Vahi Baba Saheb Dr Bhim Rao Ambedkar freedom of expression ki baat karte hain. Aur hum us position ko uphold karte hue, jo hamara buniyadi adhikar hai, jo hamara constitutional right hai, hum usko uphold karna chahte hain.

Lekin yeh bade sharam ki baat hai, yeh bade dukh ki baat hai ki aaj ABVP apne media sahiyogiyon se pure mamle ko orchestrate kar raha hai. Pure mamle ko dilute kar raha hai. SHAME. Kal ABVP ke joint secretary ne kaha ki hum fellowship ke liye ladte hain. Kitna ridiculous lagta hai sunkar ke inki sarkar, madam Manusmriti Irani, fellowship ko khatam karti hai, aur hum fellowship ke liye ladh rahe hain. Inki sarkar higher education ke andar 17 percent budget ko cut kiya hai SHAME, jis se hamara hostel pichle chaar saalon mein nahin bana. Hostel ko wifi aaj tak nahin mila, aur ek bus diya BHEL ne to us mein tel daalne ke liye prashasan ke paas paisa nahin hai. SHAME. ABVP ke log roller ke saamne devanand ke tarah tasveer khicha kar kehte hain ki hum hostel banwa rahein hain. Hum wifi karva rahein hain. Hum fellowship badhva rahein hain. Inki polpatti khul jayegi saathiyon agar is desh mein buniyadi sawal pe charcha hogi. Aur mujhe garv hai JNUite hone pe ke hum bunyadi sawal pe charcha karte hain. Hum buniyadi sawal uthate hain. Aur isilye voh [Subramaniyum] Swami kehta hai ke JNU mein jihadi rehte hain. SHAME…voh kehta hai ke JNU ke log hinsa phelate hain.

SHAME

Main JNU se challenge karna chahta hun RSS ke pracharakon ko, ke bulao use aur karo hamare saath debate. Hum karna chahte hain hinsa ke concept pe debate. Aur hum sawal khada karna chahte hain, ABVP ke us daave par. ABVP ke manch se khade ho kar bolta hai besharam: “Khoon se tilak karenge goliyon se aarti.” Kiska khoon bahana chahete ho is mulk mein tum? Kis ka dehant chahte ho is mulk mein tum?

Tumne goliyan chalayi hain. Angrezon ke saath mil kar is desh ki azadi ke liye ladhne wale logon par goliyan chalayi hain. Is mulk ke andar garib jab apni roti ki baat karta hai, jab bhookmari se marte hue log apne haqq ki baat karte hain, tum un pe goli chalate ho. SHAME…Kis par goli chalayi hai tumne is mulk mein? Mussalmanon ke upar. Tumne chalayi goli is mulk mein…mahilayein jab apne adhikar ki baat kartin hain to tum kehte ho paanchon ungli barabar nahin ho sakti SHAME…tum kehte ho mahilaon ko sita ki tarah rehna chahiye aur sita ki tarah agni pariksha dena chahiye.

Is desh mein loktantra hai aur loktantra sabko barabari ka haqq deta hai. Chahe vo vidyarthi ho, chahe vo karamchari ho, chahe vo garib ho, mazdoor ho, kisan ho, ya Ambani ho, Adani ho, sabke haqq ki barabari ki baat karta hai. Us mein mahilayon ki barabari ki baat hum karte hain, to yeh kehte hain ki hum Bharati sanskriti ko barbad karna chahte hain. Hum barbad karna chahte hain shoshan ki sanskriti ko. Jaati-vaad ki sanskriti ko, manuvaad aur Bhramanvaad ki sanskriti ko. Aur aaj tak hamari sanskriti ki paribhasha tay nahin hui. Inko dikat kahan aata hai? Inko dikat aata hai jab is mulk ke log loktantra ki baat karte hain. Jab log laal salaam ke saath leela salaam lagate hain, jab Marx ke saath Dr Baba Saheb Bhimrao Ambedkar ka naam lete hain. Jab Ashfaqulla ka naam liya jaata hai to inko pet mein darad hota hai.

Aur inki saajish hai, yeh Angrezon ke chamche hain. Lagao mere upar defamation ka case. Main kehta hun ke RSS ka itihas Angrezon ke saath khade hone ka itihaas hai. SHAME…Desh ke gaddar aaj deshbhakti ka certificate baant rahein hain. Mera mobile check kijiye saathiyon meri ma aur behen ko bhaddi bhaddi galiyan di ja rahin hain. SHAME…Kaunsi Bharat Ma ki baat karte ho agar tumhari Bharat Mata mein meri Ma shamil nahin hai. Mujhe manzur nahin hai yeh Bharat Mata ka concept. Aur is desh ki mahilayein jo garib hain, mazdoor hain… meri ma anganwadi sevika hai. Teen hazar se hamara parivar chalta hai. Aur yeh uske khilaf galiyan de rahein hain. Mujhe sharam hai is desh par, is desh mein jo garib mazdoor dalit kisan hai unki matain Bharat Mata nahin hain.

Main kahunga Jai! Bharat ki Mataon ki Jai! Pitaon ki jai! Mataon, Behenon ki jai! Kisanon, mazdooron, daliton, adivasiyon ki jai! Main kahunga, tum mein himmat hai to bolo Inqilab Zindabad! Bolo Bhagat Singh Zindabad! Bolo Sukhdev Zindabad, Bolo Asfaqullah Khan Zindabad! Bolo Baba Saheb Zindabad!

Aur Baba Saheb ki ek sau pachisvi (125th) jayanti manane ka natak kar rahe ho. Hai tum mein himmat to sawal uthao, jo sawal Baba Bhimrao Ambedkar ne uthaya, ki is desh ke andar jaativad sabse badi samasya hai. Bolo jaativad ke upar. Lao reservation! Private sector mein reservation lao! Tamam jageh reservation kayda laghu karo. Karo phir manega yeh desh tumhe. Yeh desh tumhara kabhi nahin tha, aur kabhi nahin ho sakta.

Koi desh agar banta hai, to vahan ke logon se banta hai. Agar desh ki avdharna main bhooke logon ke liye jagah nahin, garib mazdooron ke liye jagah nahin hai voh desh nahin hai. Kal main TV debate mein ye baat bol rah tha, Deepak Chaurasiyaji ko, ki: chaurasiyaji yeh gambhir samay hai is baat ko yaad rakhiyega – Agar mulk mein phansivaad jis tareeke se aa raha hai, media bhi surakshit nahin rehne wali hai. Uske bhi script likhkar aayenge [indecipherable] ke office se, aur uske bhi script likh kar aate the kabhi Indira Gandhi ke Congress ke office se. Is baat ko yaad rakhiyega.

Aur agar aap sach mein is desh mein desh bhakti dikhana chahte hain…kuch media ke saathi keh rahe the, hamare tax ke paise se, subsidy ke paise se, JNU chalta hai. Haan sach hai. Sach hai ke tax ke paise se chalta hai. Sach hai ke subsidy ke paise se chalta hai. Lekin ye sawal khada karna chahte hain, ke university hota kis liye hai? University hota hai ke samaj ke andar jo common-sense hai, quote unquote uska critical analysis kiya jaye. Critical debate ko promote kiya jaye. Agar university is kaam mein fail hai, koi desh nahin banega, desh mein koi log shamil nahin honge, aur desh hoga sirf aur sirf punjipathiyon ke liye charagah hoga, sirf aur sirf loot aur shoshan ka charagah ban kar rahe jayega. Agar desh ke andar logon ki jo sanskriti hai, logon ki jo manyatain hain, logon ka jo adhikar hai, hum usko shamil nahin karenge, to desh nahin banega.

Hum desh ke saath puri tareeke se khade hain. Aur us sapne ke saath khade hain jo Bhagat Singh aur Baba Saheb Bhimrao Ambedkar ne dikhaya hai. Hum us sapne ke saath khade hain ke sab ko barabari ka haq diya jaye. Hum us sapne ke saath khade hain ke sabko jeena ka haqq ho, sabko khane-peene rehne ka haqq ho, hum us sapne ke saath khade hain. Aur us sapne ke saath khada hone ke liye Rohit Vemula ne apna jaan gavaya hai. Lekin main kehna chahta hun in sanghiyon ko, lanat hai tumhari sarkar par, aur chunauti hi meri kendra sarkar ko, ke aap Rohit ke mamle mein jo kiya hai, voh JNU mein hum nahin hone denge. Rohit ko [punwani’?] di hai, punwani hum kya denge, hum freedom of experssion ke paksh mein khade honge.

Aur chodh do Pakistan ki baat aur Bangladesh ki baat. Hum kehte hain, duniya ke garibon ek hon, duniya ke mazdooron ek hon, duniya ki manavta zindabad, bharat ki manavta zindabad. Aur jo uss manavta ke khilaf khada hua hai, hum usko aaj identify kar chuke hain. Aur aaj sabse gambhir sawal hamare samne khada hai, ke is identification ko humko bana ke rakhna hai. Woh jo chehra hai jaativaad ka, voh jo chehra hai manuvaad ka, voh jo chehra hai brahmanvad aur punjivaad ke ghatjor ka, us chehre ko humko expose karna hai. Aur sachmuch ka loktantra, sachmuch ki azadi, sabki azadi, desh mein humko staphit karni hai. Aur vo azadi aayegi, samvidhan se aayegi, parliament se aayegi, loktantra se aayegi, aur sansad se aayegi, yeh hum kehna chahete hain. Aur isiliye, aap tamam sathiyon se appeal hai ke tamam tareeka ka differences ko side rakhte hue jo hamara freedom of expression hai, jo hamara constitution hai, jo hamara mulk hai, uski ekta ke liye hum log ekjuth rehenge, ekmust rahenge.

Aur yeh jo desh todne waali taqatein hain, aatankiyon ko panah denewale log hain: ek sawal, antim sawal poochte hue apni baat ko khatam karunga: ke kaun hai Kasab? Kaun hai Afzal Guru? Kaun hain yeh log jo aaj is stithi main hain ke apne sharir main bum bandh kar hatya karne ko tayyar hain? Agar yeh sawal university mein nahin uthega mujhe nahin lagta university hone ka koi matlab hai. Agar hum violence ko define nahin karenge, kaise hum violence ko dekhte hain. Violence sirf yahi nahin hota hai ke hum bandook lekar kisi ko maar dete hain. Violence yeh bhi hota hai ki samvidhan mein daliton ko adhikar diya gaya hai voh adhikar JNU prashasan dene se mana karta hai. Yeh institutional violence hai. Yeh log justice ki baat karte hain. Kaun tay karega ki justice kya hai? Jab Brahmanvadi vyvastha thi to daliton ko mandir mein nahin ghusne dete the, yahi justice tha. Jab Angrez the to kutton ko Aur Bharatiyon ko restraunt main nahin jaane diya jaata tha, yahi justice tha, is justice ko humne challenge kiya. Aur hum aaj bhi ABVP aur sanghiyon ke justice ko challenge karte hain, ke tumhara justice humare justice ko accomodate nahin karta hai. Agar tumhara justice humare justice ko accomodate karta to hum nahin manenge tumhare justice ko aur nahin manenge tumhari azadi ko. Hum manenge us din azaadi ko jis din har insan ko uska constitutional right milega. Jis din har insan ko uska samvidhanik adhikar dete huye is mulk ke andar barabari ka darza diya jayega, us din hum justice ko manenge.

Doston bahut gambhir paristhiti hai. Kisi bhi taur par JNUSU kisi bhi hinsa ka, kisi bhi atankwadi ka, kisi bhi atankwadi ghatana ka, kisi bhi desh-virodhi activity ka koi samarthan nahin karta hai. Kade shabdon main ek baat phir se jo kuch log, unidentified log, jo Pakistan zindabad ke naare lagaye hain, JNUSU uske kade shabdon main bhatshna karta hai. Saath hi saath ek baat jo hai usko aap sab logon ko share karte hue khatam…yeh sawal hai JNU administration aur ABVP ke liye: Is campus mein, hazaar tarah ki cheezein hoti hain. Abhi aap dhyan se ABVP ka slogan suniye: yeh kehte hain communits kutte. Yeh kehte hain Afzal Guru ke pille. Yeh kehte hain Jihadiyon ke bacche. Humein kya nahin lagta ke agar is samvidhan ne humein nagarik hone ka adhikar diya hai, to mere baap ko kutta kehna, yeh mere samvidhanik adhikar ka hanan hai ki nahin hai? Yeh sawal mein ABVP se poochta hun.

Yeh sawal poochna chahete hain JNU administration se, ke aap kis ke liye kaam karte hain? Kis ke saath kaam karte hain? Aur kis ke aadhar pe kaam karte hain? Yeh baat aaj bilkul spasht ho chuki hai. Ke JNU administration, pehle permission deta hai, phir Nagpur se phone aane ke baad permission leta hai. Yeh jo permission lene aur dene ke prakriya hai, yeh usi tarike se chit tej ho gayi hai is mulk main, jaise fellowship lene aur dene ki prakriya hai. Ke pehle aapko fellowship badhane ke ghoshna ki jayegi, aur phir kaha jayega ke fellowship band ho gaya hai. Yeh sanghi pattern hai. Yeh RSS aur ABVP ka pattern hai. Jis pattern se who mulk to chalana chahte hain. Aur issi pattern se woh JNU administration ko chalana chahte hain. Humara sawal hai JNU ke Vice Chancellor se ke poster laga tha JNU main, parche aaye the mess mein. Agar dikat tha to pehle JNU administration permission nahin deta. Agar permission diya, to kiske kehne se permission cancel kiya, yeh baat JNu administration clear kare, yeh sawal hum sirf poochna chahte hain.

Saath hi saath yeh jo log hain inki sacchai jaan lijiye. Un se nafarat mat kijiyega, Kyonki hum log nafarat kar nahin sakte. Inse mujhe, bada hi daya bhav hai inke prati mujhe hai. Yeh itne uchal rahe hain. Kyon? Inko lagta hai jaise Gajendar Chauhan ko baithaya hai, waise har jageh Chauhan, Diwan, Farman jaari karte rahenge. Yeh Chauhan, Diwan aur Farman ki badaulat yeh har jagah naukari paate rahenge. Isiliye jab yeh jor se bharat mata ki jai chilayein to aap samajh lijiye ki parson inka interview DU mein hone wala hai. Naukari lagegi, deshbhakti peeche chootegi. Naukari lagegi, bharat mata ka koi khayal nahin rahega. Naukari lagegi, tiranga ko to inhonein kabhi mana hi nahin, bhagwa jhanda bhi nahin phirayenge. Main sawal karna chahta hun ke yeh kaisi deshbhakti hai. Agar ek malik apne naukar se sahi bartav nahin karta, agar kisan apne mazdoor se sahi bartav nahin karta hai, agar punjipati apne employee se sahi bartav nahin karta hai, aur ye alag alag channel ke log, jo patrakari ka kaam karte hain 15 hazar rupaiye ke liye. Inke jo CEO hain, woh inse sahi bartav nahin karte hain. Woh kaisi deshbhakti hai? Inki deshbhakti bharat pakistan ke match pe khatam hoti hai.

Isiliye jab ye road pe nikalte hain to kelewale ke saath badtamizi se baat karte hain. Kelawala kehta hai sahab chalis rupaiye darzan bhav hai. Kehtein hat! Tum log loot rahe ho! Tees ka de do. To kelawala jis din mud kar bol dega: tum sabse bade lootere ho, croron loot rahe ho, to keh denge ke ye deshdrohi hai. Aastha amiri aur suvidha se suru hoti hai, amiri aur suvidha pe jakar khatam ho jaati hai.

Main bahut saare ABVP ke doston ko jaanta hun. Main un se poochta hun: ki sach mein tumhare andar mein deshbhakti ki bhavna panapti hai? To kehte hain, bhaiyya kya karein, paanch saal ki sarkar hai, do saal khatam ho gaya hai, teen saal ka talktime bacha hai, jo karna hai isi mein kar dalna hai. To hum bole theek hai kar lo, par yeh bataoe ke JNU ke baare mein jhoot bologe to kal ko tumhara bhi collar koi pakad lega, aur tumhara hi saathi pakad lega, jo aaj kal train main beef check karta hai. Pakad ke tumko lynching karega aur kahega ke tum jo ho desh bhakt nahin ho kyonki tum JNUite ho. Iska khatara samjhte ho? Kehta hai, bhaiyya iska to samjhte hain, isliye to JNU ka jo hashtag bana hai, #shutdownjnu, uska virodh kar rahein hain. Humne kaha bahut badhiya hai bhai sahab! Pehle JNU hashtag ke liye mahaul banao, phir uska virodh karo kyunki rehna to JNU mein hi hai na.

Isiliye main aap tamam JNu ke logon se kehna chahta hun ki abhi chunav hoga march mein aur ABVP ke log Om ka jhanda laga ke aap ke paas aayenge, to un se poochiyega ke hum desh drohi hain, hum jihadi atankvadi hain, hamara vote lekar tum bhi atankvadi ho jaoge. Tab ve kehenge ke nahin nahin aap log nahin hain, vo kuch log the. To hum kehenge, ke vo kuch log the? Ye baat to tumne media mein nahin kahi, tumahar vice chancellor nahin bola, aur tumhara registrar bhi nahin bol raha hai. Aur vo kuch log bhi to keh rahe hain ki hum pakistan zindabad nara nahin lagaye.Voh kuch log bhi to keh rahe hain ki hum atankwad ke paksh main nahin hain. Wo kuch log bhi to keh rahe hain ke hamara permission de kar permission cancel kar diya, yeh hamare democratic rights ke upar attack hai. Par itni baat, inke palle padni wali nahin hai.

Lekin mujhe pura bharosa hai ke yahan ye jo log itne short notice pe aaye hain, unke palle pad raha hai, aur vo log is campus ke ek ek student ke paas jayenge, aur unhein batayenge ke ABVP na sirf is desh ko tod raha hai balki JNU ko tod raha hai. Hum JNU ko tootne nahin denge. JNU zindabad tha, JNu zindabad rahega. Is desh ke andar jitne bhi sangharsh ho rahe hain un sangharshon mein badh chad kar participate karega aur is desh ke andar loktantra ki awaz ko mazboot karte hue, azadi ki awaz ko mazboot karte hue, freeedom of expression ki awaz ko mazboot karte hue, is sangharsh ko aage badhayega. Hum sangharsh karenge, jeetenge, aur in sahbdon ke saath, aap sab ka shukriya, inqilab zindabad, jai bhim, lal salaam!

 

 

 

 

 

 

 

 

 

 

 

 

 

 

 

14 thoughts on “JNUSU President Kanhaiya Kumar’s speech before being arrested

  1. Subhash Mendhapurkar

    Thanks for circulating this otherwise people living outside JNU would have never been able to get the facts – given the way mainstream media is working hands in glove with the establishment

  2. Pingback: JNUSU President Kanhaiya Kumar’s speech before being arrested | Ramkrishnagoel's Blog

  3. K SHESHU BABU

    Kanhaiya Kumar speech stole the show. This ceaed panic among ABVP students and their jealousy leading to their unethical behaviour both during and after the soeech.

  4. Preeti Chauhan

    What a firebrand speech by him with so much clarity on a range of issues, absolutely grt! Heard it yestrday too on scroll & the only reason that he has been targeted is that he challenges the union government twice in his speech, that jnu will not tolerate what the govt.is doing in other universities.
    He retierates his faith in the constitution, in B.R.Ambekar’s vision and equality for every citizen of this country.Even at the best of imaginaton, one can not find any expression which can be called ‘seditious’ forget about inciting violence unless criticising the RSS & hindutva has become the new definition of ‘sedition’! Shameful to the core that the govt of this country(& the country can not be reduced to just bjp voters) is behaving like a local party unit.
    Its extremely dangerous that the media is playing to the gallery, ABVP cadre being given time to discard the counter video but no mention of kanhaiya kumar’s speech. Let the media play it & let the people see for themselves.
    And lastly what about the role od delhi police? It seems B.S.Bassi is not The Commissioner of delhi police & but BJP Commissioner of BJP police! Why is no political party calling for his sacking? He has been so blatantly partisan throughout.

  5. Pingback: #NoDissentNoCOUNTRY #StandwithJNU | Kafila

  6. Pingback: #NoDissentNoCOUNTRY #StandwithJNU | Kafila

  7. Pingback: #NoDissentNoCountry #StandwithJNU | Kafila

  8. Pingback: #NoDissentNoCOUNTRY #StandWithJNU | Kafila

  9. Vijay Monga

    sorry you didn’t mention the date of speech and this act on your part speaks volumes of truth.
    Vijay Monga

  10. Pingback: #NoDissentNoCountry #StandWithJNU | Kafila

  11. Pingback: Limits of Free Speech II: The JNU “Anti-National” controversy – ThinkerTinker.

We look forward to your comments. Comments are subject to moderation as per our comments policy. They may take some time to appear.

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s